ឆ្នេរកែប
ទីក្រុងកែបជាទីក្រុងទេសចរណ៍ឆ្នេរសមុទ្រមានទីតាំងស្ថិតនៅភាគនិរតនៃរាជធានីភ្នំពេញ ភ្ញៀវទេសចរណ៍អាចធ្វើដំណើរ ពីរាជធានីភ្នំពេញមកក្រុងកែបតាមផ្លូវជាតិលេខ៣កាត់ តាមខេត្តកំពតមានចំងាយប្រមាណ១៧៣គ.មឫតាមផ្លូវជាតិលេខ២កាត់តាមខេត្តតាកែវ ឫក៏ អាចធ្វើដំណើរតាមរថភ្លើងមកចុះនៅស្ថានីយ៍ តំណាក់ចង្អើរដែលមានចំងាយពី ក្រុងកែប៧ គ.ម។ភ្ញៀវទេសចរបរទេសអាចធ្វើដំណើរពីប្រទេសវៀតណាមមកក្រុងកែប តាមច្រកហាទៀង ព្រែកចាកដែលមានចំងាយប្រមាណ ៤០គ.ម។ តាមផ្លូវសមុទ្រ ភ្ញៀវទេសចរអាចជិះទូក កប៉ាល់ ពីក្រុងព្រះសីហនុនិង ពីប្រទេសវៀតណាមមកកំពង់ផែ ក្រុងកែបផងដែរ។
ខេត្តកែបបានកសាង ឡើងក្នុងអំឡុងឆ្នាំ ១៩០៨ ក្នុងសម័យ អាណានិគមបារាំង។ ខេត្តនេះបានកែលំអឲ្យក្លាយជាទីក្រុងទេសចរណ៍ឆ្នេរសមុទ្រដ៏ល្អ ប្រណិតក្នុងទស្សវត្សទី៦០នាសម័យរាជរដ្ឋាភិបាលសង្គមរាស្រ្តនិយម។ ឈ្មោះខេត្តកែប បានក្លាយមកពីពាក្យបារាំង“Lecap”ប្រែមកជាពាក្យខ្មែរ គឺជ្រោយមានន័យថាដីដុះលយ ទៅសមុទ្រ។
តំបន់នេះ ប្រភេទខ្សាច់សមុទ្រ មានពណ៍ខ្មៅ ខុសពីខ្សាច់ក្រុងព្រះសីហនុ ដែលមានខ្សាច់ពណ៍ស។
រមណីយដ្ឋានកោះទន្សាយ
កោះទន្សាយមានទីតាំងស្ថិតនៅ ប៉ែកអាគ្នេយ៍នៃទីក្រុងកែបមានចម្ងាយ៤,៥គីឡូម៉ែត្រពី ទីក្រុងនេះ។ ទីនេះជារមណីដ្ឋានធម្មជាតិដ៏ល្អប្រណិតរបស់ទីក្រុង ដែលមានលក្ខណៈអំណោយពីធម្មជាតិព្រោះមានឆ្នេរខ្សាច់ចំនួន២កន្លែង ដែលមានវាលខ្សាច់សពីធម្មជាតិ អាចធ្វើជាកន្លែង សំរាប់ងូតសមុទ្រកម្សាន្តសប្បាយបាន។ ទឹកសមុទ្រមានជម្រាលវែង ហើយរាក់។ខាងក្រោមទឹកសមុទ្រមានផ្កាថ្មសត្វសមុទ្រ រុក្ខជាតិសមុទ្រអំណោយផលដល់ ការស្រាវជា្រវប្រព័ន្ធបរិស្ថានចំរុះ។ ឈ្មោះកោះទន្សាយនេះបានក្លាយមកពីពាក្យ រំសាយ ព្រោះនៅពេលដែល ស្តេចសាគររាជ អស់សង្ឃឹមក្នុងការតស៊ូដោយមានការបែកបាក់
ពលសេនានិងបក្សពួកខ្លួនព្រះអង្គបានដឹកនាំអ្នកដែលនៅសេសសល់ឆ្លងសមុទ្រមកដល់ កោះមួយនៅខាងមុខក្រុងកែប ហើយក៏បានធ្វើការរំសាយទ័ពនៅទីនោះទៅ។ ដោយការ ហៅតៗគ្នា កោះរំសាយក្លាយទៅជាកោះអំសាយ កោះអន្សាយក្រោយមកក៏ក្លាយទៅជា កោះទន្សាយ រហូតដល់សព្វថ្ងៃនេះ។កោះទន្សាយមានផ្ទៃដីប្រមាណ ២គីឡូម៉ែត្រការ៉េ ។